Dun Gaspar Floresmi, Santa Rosah taytan, Virreypa "guardia de honor" nisqah wayllawisakunah wamink'an karan. Chaymi "Palacio Pizarroh" sispanpi tiyayta maskhaspa, qurpachakusqa Pedro de Valladolihpa wasinpi. Chaypiyá churiyasqa chunka huhniyuh wawankunata.
Santa Rosah wañupusqanmanta pachan,24 agustu killamanta
pachan Lima runakunaqa huñunakuyta qallarinku chay wasipi.
Hinaspanmi paykunaqa alkilernin paganankupah mink'anakunku. Qanchis p'unchay awrilmantan, l669 watapi,Dun Andris Caballero Santiyagu Ordenmanta, Consejo de Majestad nisqamantawan, rantirapun chay wasitaqa hinaspatah quykapun Orden de Predicadores nisqa kurakunaman chay huh inlisatawan, Santuwariyu nisqatawan sayarichinankupah mamanchis Santa Rosaman.
Chay wasi, Santa Rosa tiyasqanqa, yaqa kah kahllan kunankamapis kashan. Tiyasqan wasikunatan Inlisaman tukuchinku ichaqa muyatapis, huch'uy wasicha chaypi wisq'akusqan Taytachaman mañakunanpah, "ermita" nisqaqa kahllan kashan.
Chayllapitahmi kashan unu, yaku hurkunapah t'uqusqankupis. Chaytan "Pozo de Santa Rosa" nispa rihsinku. Chay t'uqutan waturikunku watantin, aswantaqa sapa 30 de agustupi. Chaypiyá qilqasqpa churayunku, Santa Rosaman tukuy ima mañakusqankuta. Santa Rosa munahkunapahqa chay t'uquyá chaskipis kanman hina kashan kunayninku Santaman apah.
Chaymantapis yuya yuyarinkupunin chay "ermita" nisqataqa. Chayqa huch'uy wasillan riki, chaypitahmi Rosa de Santa Mariyaqa Diyus mañakuypi rixurih tuta p'unchay, huhkunah huchan raykutahmi tukuy ñak'ariyman churakuh.
Chay santuwariyu nisqaqa sapa p'unchaymi aswan askha runayuh rixuripushan. Lluymi maskhanku Rusataqa ancha munaywan, tukuy ima Diyusmanta aypanakupah. Munay munay wamanka rumipin, inlisapiqa kashan Santa Rosah kawsaynin sumah siq'isqa.
Ñawpah Inlisaqa sayariranyá l670 watapi. Ichaqa yaqa kinsa chunka watañan qhurusqa rixuripun Av. Tacna kamarikuhtin hinaspanmi kunanqa qhawapushan muyaman. Icha ancha allinmi kashan.
Santa Rosa raymichakuyqa wasin waturikuypin,
prusishunin qatiypi iman kashan. Chaypin
sumahta mañayukunku tukuy imatapis
wantunamanta "andas" nisqamanta
hap'ipayukuspa, t'ikankunata ima aparikuspa.
AKunan pachan askha ayllukuna p'istuyukunku Santah amachaninwan. Enfermera nisqakunapahpis, Cáritas del Perú ayllupahpis, Policia Nacional del Perú nisqapahpis, Mineros del Perú nisqakunapahpis Patronanyá. Chaymantapis Patronaykun ninkun Argentinamanta, Paraguaymanta wayllawisakunapis.
Sumahtan takiyuhpis, pisqukunawanpis rimayuh iman, imaynan rimah angelkunawanpis hinayá. Chaymantapis maqanakuhyá sahrakunawanpis. Ichaqa sinchitapunin munah waxchakunata, unquhkunata ima. Santa Rosa rihsiyqa Lima llahtah kawsaynin rihsiymi. Chaymi Santa Rosamanta rimayqa Perú llahtamanta, Lima llahtamanta ima rimay.
