Kawsakuyninpin Ñak'arih Rusaqa, wawa kasqanmanta pacharahmi ayqih tukuy ima kusi kawsaymanta, t'ihmuymanta. Imaynan willakun huh ñawpah imillan hina, Rusaqa sapa tutas wahtayukuh wasinpa muyan uxupi. Wasanpis q'uyus, k'irinchasqa imas rixurih. Chaysi Juan de Lorenzana kunphisahnin kura phiñarikapusqa. Chaywanpis Rusaqa, llanp'u sunquyá mañayukusqa huhmanta k'irinchakunanpah runakunah huchan mana yayanchis Hisukrututa astawan k'irinchananpah. Wakin kutiqa pisqa waranqa kutis hasut'iyukuh. Chay duminiku unkuwan warachikuspaqa iskay qillay waskhawanyá mat'iyukusqa t'ihninta, chayqa hina kamachisqan kashan taytacha Santu Duminguh, nispa. Chaynwanpis hasut`iyukuhmi chay qillay waskhakunawan sapanka tuta. pipas maypas huchapi t'ihmushanman chayqa astawansi yapayukuh chay ñak'ariyta hucha kay pachapi ch'usahyananpah. Unqusqa kahtinqa saqihsi qhaliyaspa hasut'iyukunanpah.
Wakin kutiqa hasut'ikusqanqa sinchitas chhallallallayuh. Chaysi wasinpi kawsahkunaqa nihku: Qillay waskhachusuna chhallurakapun, nispa. Chayqa yuyaymananayá hayk'atas k'irinchakuh chayta.
Chaymantapis kiska pillutas pillukuh umanpi Hisukristu taytanchis hina ñak'arinanpah runakunah huchan rayku. 'Lata' nisqakunamantas pilluta ruwarusqa ancha kiskayuhta kikin latallamantatah. Chaymantañatahsi ruwallasqatah qulqimanta huh musuh pilluta. Chayñatahsi isqun chunka kiskayuh kasqa chaywan k'irinchakunanpah "tachuelas" nisqa kiskayuh. Chaykunawansi sillwiyukusqa, mat'iyukusqa ima, runakunah huchan panpachakunanpah.
|