Patpakunawan katashka wasipi

Ecuador kichwapi willarashka. Kallarina killkashkami katik sityupi kashka:
http://www.ucentral.edu.ec/facultades/filosofia/proyectos_turisticos_biologia/proyecto_tungurahua/comunidades/comunidades_indigenas_leyendas.htm (manañami kanchu)
Killkashkata "scanning" nishkamanta shamuk pantashkakunamantami Runasimi.de allicharka.

Kaypimi kallarina willashkamanta killkashka.

Imaraykutaq "Ñawpa Pachami" ñispa, manataq "Ñawpa Pachashi" ñispa qillqarqan?

Ecuadormanta qillqaqqa, manapunim Waruchiripi kasqakunata kikillan rikuspa, "ñawpa pacha kashkami" ñispa, manataq "ñawpa pachashi kashka" ñispa qillqaptin, muspachiwarqanmi. Ichapas llaqtanpi runakuna manach "-shi" ñispa, yallinraq ñawpa pachapas kasqakunamanta "-mi" ñispa rimaqchá. Chay hina kaptinqa, imaraykutaq "-mi" ñinankuraq? Chay runaqa chay hina qillqaptinmi, ñuqapas paypa qillqasqan hinallataq kaypim qillqani.

Watyakuri nishka runamanta - Waruchiri kitipi (Piruw llaktapi) kashkamanta willashka

Ñawpa Purunpachapika, tukuy runakunami alli kawsayta kunkashka, tawka ayllupurami awkaykunata kallarishka, ranti ranti yanaparinatapash kunkashkakuna, imatapash charinallatami munashkakuna.

Chay panta kawsay pachapika, charikpash kariyashkapash runakuna alli pushak llamkayman chayashkakuna; wakinkunaka kuraka tukushkakuna; shuktakkunaka mana yachak kashpapash, yachakshinami rikurishkakuna.

Kay ñawpa rimayka kayshinami kallarin:

Tamtañamqa runami ninan charik runa kashka, payka achka tukuy tullpuyuk llamakunatami charishka; shinallatak shuk jatun, tukuy wasikunata yallik kuyaylla wasitapashmi charishka.

Kay wasika pirkatapash, katashkatapash sumak pishkukunapa patpakunawan kirpashkami kashka. Kay patpakunaka tamya ama yallichunmi jarkak kashka, shinallatak ama yapa rupay kachunpashmi jarkak kashka.

Achka achikyakuk ñutu ankas patpakunawanmi, sañushinawan wasitaka katashka kashka; inti punchayachikpika ashtawan mirarishpashina kay patpakunaka rikurik kashka. Shinallatak uritukunapa, takik pishkukunapa, killu, puka, waylla patpakunapashmi sumakña rikurikushkakuna.

Kay sumaymana wasimanta, pay alli kawsaymantapash, shuktak runakunaka:
"Kayka apunchik wakami kan" nishkakunami; "paymi runakunaman, wiwakunaman, shuktak kay pachapi ima tiyakkunamanpash kawsayta kun" nik kashkakunami. Tamtañamqaka shuk runakuna chayshina payta yuyakpika, payta muchakshina payta yuyakpika; payta muchacha kawsachunmi mañashka.

Tawka watakunatami runakunaka kay panta yuyaywan kawsashkakuna. Shinapash mana umachishkalla kawsayta usharinchu, shinami, shuk punchaka Tamtañamqa unkurishka, mana payka apunchik kashkamanta payllata jampiriytaka mana ushashkachu, chayka chay llakta yachakkunapaman rishkami. Chay punchawantami ña mana inishkakuna, chayka ña Tamtañamqata rikurayay kallarishkakuna.

Kutin yachak runakunaka utka-utkalla chay patpawan rurashka wasiman chayashkakuna, chaypika kushillami chaskiy tukushkakuna. Tamtañamqapa warmintin, ushushikunantinka shuk sumak chiriklla, pukyumanta wacharikuk yakutami apashpa karashkakuna; mikunanatapash, aswatapashmi karashkakuna. Shuktak imakunatapash karashpa karashpa katishkakuna.

Ña sumaklla, chaskiy tukushka kipa, yachak runakunaka, Tamtañamqapa kawitu muyuntinpimi tiyarishka. Chayka tukuy sami tapuykunatami rurashkakuna, shinapash imamanta Tamtañamqa unkurishkataka mana tarishkachu.

Chaykamaka, kanchapika achka Tamtañamqapa ayllukunami:
"Ima kakta yachashun" nishpa shuyakushkakuna. Kayshina ruraykunami Anchiqucha llaktapi tiyashka.

Chaykamaka chay chishillapitakmi Watyakuri runaka Latawsaku urkupi samakushka. Watyakurika mamakuchamantami Waruchiri markaman shamushka kashka.

Payka ninan wakchashinami kashka; watyallata, allipapi kusashka papakunallatami mikuk kashka; chaymantami shuktak runakunaka Watyakuri(ta) nishpa, asishpa rikukkuna kashka.

Kay Watyakuri wamraka, shuk yurapa llantupimi puñukushka, chaymanmi shuk ishkay atuk chayashka; muskuk, muskukllami:
"Uyay wawki, imashinatak kan kay, jawa llaktapika?" nishpa, shuk wichiyakuk atuk tapukta,uyashka.

Kutin,urayman rikuk atukka:
"Ima alli kanaka allimi kan" nishkami. Shinapash: "Shuk ninan charik, kariyak, apunchik waka tukushpa umachik runami unkurishka; mana pipash yachay tukunchu imamanta unkurishkata, shinapash ñuka kikinman willachik rini" nishkapashmi.

"Tamtañamqapa warmi kamchakukpimi shuk tukuy tullpuyuk sara muruku pawashka; kay sarata japishpaka, shuktak paypa puñunkapak munashka runamanmi karashka; kay runaka mana paypa kusa Tamtañamqachu kashka. Kayshina kusawarmi mana alli kawsaymantami, kunanka ishkay amarunkuna wasi jawapi kawsan, shinallatak, wasi uku, shuk kutana rumi ukupimi, shuk jatun ishkay umayuk jampatu kawsan; chaykunami Tamtañamqataka wañuchik rinakun" nishpami willashka.

Atukkuna rikwanmi Watyakurika jatarishpa Tamtañamqapa wasiman rishka. Shinapash mana riksishpa, tukuy tuparik runakunatami:
"Manachu kikinkunapa ayllupi, shuk unkurishka runa tiyan?" nishpa tapushpa rishka. Shinami shuk sumaklla kuytsa Chawpiñamqaka:
"Ñuka yayami unkurishka" nishpa kutichishka. Kuyaylla kuytsa kashkamanta, Watyakurika:
"Ñukawan sakiriy, kikinmanta kampa yayata jampisha" nishkami.

Chawpiñamqaka imatapash mana kutichishkachu, shinapash yayapaman pushashpami rishka. Wasiman chayashpaka:
"Kay runaka 'jampiyta ushasha' ninmi" nishpami willashka. Shinapash chay yachak purun runakunaka mana wakchakunataka llakikkunachu kashka, chayka mana inishpa, asillatami asishkakuna. Shinapash Tamtañamqaka kayashkami, payka ña mana yapa kariyashkachu kashka,unkuriymanta ashata ña alli runami kashka, jampiririnallatami munashpa sirikushka.

Watyakurika imashina Tamtañamqaman nishkata kutinmi kay wañukuk yayaman nishka, chaypa katiyka kutinmi:
"Uyay yaya, kikinpa warmimi shuk kariwan umachishka, chaymantami wasi jawapi ishkay amarunkuna kawsan, wasi uku, kutana rumipipash shuk ishkay umayuk jampatu kawsan, paykunami kikintaka wañuchik rikunkana, chaykunataka wañuchinami, chaymi kikinka jampirinki, kutin minchapi ñuka yaya wacharinka, paytaka muchashpami kawsana kanki; kanka mana kay allpa mamapi ima tiyaktapash kawsachikchu kanki, shina kashpaka mana unkurinkimanchu karkanki" nishkami.

Chay llakta runakunaka Tamtañamqa jawallami rimakushkakuna. Shinapash Tamtañamqaka utkallami paypa wasita shitachun mañashka.

Shina, ashalla pachapirami, tukuykuna rikukta, chay sumak patpawan sinchita llamkashpa katashkataka anchuchishkakuna. Yachak runakunaka mancharishpami rikukushkakuna, imashina Watyakuri nishkashinami ishkay amarunkunata tarishka. Katiyka kutana rumi ukupimi mashkashkakuna, chaypika manarak pipash wañuchikllapitakmi ishkay umayuk jampatuka Anchiqucha waykuman mitikushka.

Kay sumak patpakunawan rurashka wasi jawaka tukuy runakunapa yuyaypimi sakirishka. Kusawarmikunapash paypa pantaykunata sakishpami alli kawsay kallarishkakuna. Tamtañamqaka allimi jampirishka. Kutin Watyakuriwan Chawpiñamqawanmi sawarishkakuna, shinashpami Kunturqutu urkuman rishkakuna; chay urkupika pichka lulunshinami Pariyaqaqaka paypa wawkikunantin tiyakushkakuna kashka.

Shinapash Tamtañamqata paypa warmi umachishkataka unay pachapimi runakunaka kunkashkakuna. Kutin wakin runakunaka chay Anchiqucha waykuman chapakpika, ishkay umayuk jampatumi manchachik, chinkachikpash kashka, ninkunami.

Runashimipi Willakuykuna, Killkashkakuna

(pankapak kallarinaman)

 


Last update: Feb 16, 2005. © runasimi.de.  The contents of this page may be distributed for non-commercial purposes, especially for spreading knowledge of the Runasimi language in the world and strengthening its position in its home lands. Please quote the original author (if not mentioned by name, write runasimi.de), and set a link to this page (write down URL, if texts or images of this page are used in printed version).