Waskaran raxuh k'uchunpin -chay rit'i urquqa hatunllañan riki- Waras llahta kashan. Chay suyupitahmi Simana Santaqa sinchitapuni tukupun hatun raymiman, imaynan ñawpa pacha rayminkunapis yuyarikushan hinarah.

Hahiy sunqu suwa k'ititaqa tihsimuyun sutinchan "Suiza Peruana" nispa, ancha munaycha kahtin. Suizaqa huh Iwrupa suyupin manchay rit'i urqunawan t'ikallisqa kashan. Chay Waraspiyá karguyuh nisqa runakunaqa qulqita huñunku watantin. Hinallatahmi, uywatapis, tukuy ima mixuytapis wiñachinku chay phistapah. Chaypiyá kawsah runakuna Kristumanta rixuripunku hinaspa chakatasqa ima yuyarinku chay "Martirio del Gólgota" nisqata.

Dumingu Ramus raymiwanyá qallarin Simana Santa yupaychaqa. Chaymi chuntah, yarinah k'allmankuwan mallkichasqa taytacha Hisukristuqa asnuchapi sillayukuspa puriykacharun tukuy kallikunata. Runatahmi anchatapuni ullpuykukun chay taytachah ñawpaqinpi.

Chiqah Diyusman sunqun llahta rixuripun chay p'unchaykunaqa. San Antunu Conventumantan "Señor de la Oración' wankiqa lluhsimun prusishunpi. Chay wankin sinchi wayllunapahqa ancha sumah llut'asqa, lluch'isqa ima kahtin.

Martis Santuñatahmi "Cristo de la Columna" taytacha, Pilatospa wasinpi ñak'arihta yuyarispa, lluhsimullantah prusishunpi. Wakin runakunaqa p'achallikunku Roma llahtah Pretoriyanun hinan.Chaykunaqa wayllawisakunan riki.

Mirkulis Santuñatahmi "Cristo Pobre" taytacha puririnallantah pukamanta p'achallisqa, kiska pilluyuh ima. Tukuy llahtayá bilantin qatin taytachataqa.

Huywis Santuqa yuyarinkun "Eucaristía" sacramintuh kamarikuyninta. Chay p'unchaymi chaskiyunku huchankumanta ch'uyanchakuspa "comunión" nisqata. Chaymantaqa waturikunkuyá unquhkunata ancha munakuywan.

Ña tutachataña puririnku "La Soledad" inlisaman. Chaypin mañakuyman, takiyman ima churakunku pacha paqariy k'ancharinan kama. Chaytan ancash kichuwapiqa ninku "Warayki" nispa.

Virnis Santupiqa parapis chayayumin. Ichaqa "Cristo de la Cruz", chakatasqa taytachah prusishunninqa Mamacha Dulurispa ñawparisqanqa sumahtayá hunt'akun. San Huwan Apustulpis, Mariya Magdalenapis rixurinkuyá chay kikin hatun prusishunpiqa runakunah munayninwan ullpuykusqan.

Tutayapushahtinqa, rasphi rasphi uxupin wakin runakuna rixurimunku yurahmanta p'achallisqa hinaspanmi taytacha Hisukristuta hurqupunku crusmanta. Chaytahmi Hisukristuh ayantaqa "Santo Sepulkru" nisqaman churayapunku. Chayqa tukuy rikunan kashan bidriyu uxupi. Chaytayá prusishunpi apallankutah ancha sumah wayllukuypi.

Sawaru Gluriyapiqa irqikunan t'iqirunku Judaspa wankinta hinaspanmi sinchita k'amiyuspa aysaykashanku qhatunah k'itinkunapipas, puxllana suyukunapipas. Chaymantaqa nina qunuypin rawrachipunku runakunatahmi chaywan sinchita asiyukunku.

Dumingu Risurrixiyunpiñatahmi "Cristo Resucitadota" prusishunpi puriykachachinku Lasa de Armaspi. Chaypiyá sumah tinkuy rixurin mamacha Dulurusawan. Chay tupay qhipanmanqa phawarichinkun urpichakunata hinaspatahmi willakun hinantin suyuman kay kunakuyta: Kristu Hisusqa wañusqanmanta kawsarinpunmi. Kusirikuychis, Aleluya, Aleluya, nispa.