Mana iniy atiy rixch'akuykunapis kashantáh

Naska Siq'ikuna rihsikusqanmanta pachan tukuy imaymana rimariy rixuripun. Mariya Reicheh rimasqanmi aswan iniyqa mast'arikapushan. Kay siñurachan tawa chunka wataña chay siq'ikunataqa istudiyarun, paytahmi nin: Kay siq'ikunaqa hanah Pachah kawsayninmi, ñawpa runakunah silu qhawasqankun, "calendario astronómico" nisqa sutiyuhmi, ninyá.

Von Daniken, alemaniyamanta wiraquchañatahmi nin: kay siq'ikunqa huh karu tihsimuyukunamanta hamuh awiyunkunah tiyayunanpah ruwasqa siq'in, nispa.

Chaymanta pachan huh runakunaqa imaymanata rimayushanku. Wakinqa, huh mana yuyay atina runata qhawarispan, nishanku: Imaynapitah naskakunari huh "astronawta" nisqatari llinp'inkuman, nispa. Chaymanqa ductura Reichen kayta kutichin: Chay siq'iqa mana astronawtachu. Chayqa ch'usih runan imaynan llinp'isqa kashan naska k'aphrakunapi, nispa nin.

Chaymantaqa huh hina tapukuykunan rixurimushan: Imaynatatah naska runakunari llinp'iyta atiranku chay mana chanin hatun siq'ikunatari, nispa. Chaypahqa riki sinchi wichaymantan qhawana karqan imaynan kunanpis chay rikunapahqa awiyumanta pachan qhawana kashan riki, nispayá nillankutah.

Yachay sapa runakunaqa ninkuyá: sinchi llank'aypunin kanman karan chay chiqan siq'ikuna qatiyqa, chaymantatah huh hina huh hina kinraymanpis chutariyqa hinaspatah tukuy imapis allin hunt'asqapuni rixurinanpah.

Wakin qilqahkunaqa ductur Kosokta qatikuspan ninku: Chay siq'ikunataqa manan runakunachu ruwaranku. Chaytaqa ruwarankuchá huh tihsimuyukunamanta hamuh runakuna, "extraterrestre" nisqakuna, nispa.

Naska runakunaqa ancha yachay sapa runakunan.

Ñan iskay waranqa watamanta pachaña naska runakunaqa, sapanka wata qallariypi, q'uñi mit'api, chiri mit'apipas, tukuy imaymanata anqusaranku iniyninku uxukunapi. Chayqa manchay rihsisqan kashan.

Kunan yuyaymanasunman runah manchay yachaypi thaskirisqanta, hinaspapis "espacio sideral" nisqa suyuman chayasqanta ima chayqa, tuparunmanmi chay naskakunah yachayninwanqa. Paykunaqa ña iskay waranqa wataña, Naska Panpapi ruwasqaku siluh ritratunta, hanahpa rixch'akuyninta, "centro espacial" nisqata. Chaypin tukuy imata liyisqaku chay "espacio sideral" nisqamanta. Chaytan chaninchan chay ductura Mariya Reiche.

Naska Siq'ikunaqa hatun qilqan yachay sapa runakunah qilqasqan chay panpapi. Chaypin tukuy imatapis ñarah silumantapis, ñarah kay pachamantapis liyiruwah.

Naska Siqíkunaqa ch'usahyapunmansi

Kosok taytaqa, qilqasqanta qallarispan, khaynata yuyaymanan: Naska siq'ikunaqa huh sinchi hatun pisarapis kanman hinan. Chaypiyá sinchi hatun makikuna qilqasqaku tukuy imaymanata tihsimuyuntinpa kayninmanta . Ichaqa chay umiña, hiwaya siq'ikunaqa ch'usahyaymanmi puriripushan as usqhay usqhayta, nispayá willakun Kosokqa..

Chhaytukuy unay wata allin kah siq'ikunaqa ch'usahyarapunmansi. Ima rayku. Chay panpantan kamiyunkuna phawaykachashanku allpata ñut'uparispatahmi phuyuta hinarah huqarishanku, chhaywantah lluy siq'ikunata p'anparapushanku. Chaytan siñuracha Mariya Reicheqa sut'incharun.

Chhaynallata tukuytapis saqikuhtinqa pisi watallapis tukuypis ch'usahyarapunqa. Chhayna kahtinqa manañayá imapis qhawarinapah qhipanqachu. Chaymi Mariya Reicheqa, ancha llakikuspa, mañakun tukuy kamachikuhkunamanta "Líneas de Nasca" nisqamanta, Naska Siq'ikunamanta sayarinankupah.