Ayllu ruru

Ayllup rurun misk'i mikhuy
wiqip yakunwan qarpasqa,
sirk'a yawarwan qispisqa.
Qampim sut'i nanay purin,
llaqta ayllup para wiqin.

Ay apullay! Pachamama,
wañuq sunqu rikch'arichiq,
Quyllurpa akchin murk'iriq
Atipachiy kay kallpa ñawita
willkasqa sunqup yurinanpaq.

Ischhup chhullan waynakuna
wayrariptin ch'usaq tukuq,
tuqachuq sunqun sipaskuna
rawrariptin q'usñi tukuq,
qhachwa chawpipi muhuchakuq
mukmu t'ika qhulla mikhuy.

Ayllup rurun wayna, sipas.
Maymi waylluq sunquykichik?
Ay urpillay ch'usaq q'isa!
Qaynamanta wañuyman karqan,
mana q'uyti sunqu runakunata
rikuspa, llakiypi kawsanaypaq.

Phutiq mukmu, misk'i mikhuy
pantay ñanpa t'ikrachasqan,
q'achu ch'uñuta millakuspa,
qhulla mut'ita qunqay atiq.
Manachu ñawiykita kichariwaq
llaqtap sunqunpi k'anchaspa
wiñay kusikuy llanllananpaq,

Ari, chiqapta chaywanqa,
achhanqaraymi suni waytanman,
pachak waranqa phanchiyninpi
mana hayk'ap yawarta waqaspa.
Ayllup rurun misk'i mikhuy!

(Chinchaypukyu, Qusqu.)

Runasimipi Willakuykuna, Qillqasqakuna

Rapip qallananman


Last update: Jan 19, 2008. © runasimi.de.  The contents of this page may be distributed for non-commercial purposes, especially for spreading knowledge of the Runasimi language in the world and strengthening its position in its home lands. Please quote the original author (if not mentioned by name, write runasimi.de), and set a link to this page (write down URL, if texts or images of this page are used in printed version).